|
Azərbaycanda latın əlifbasına keçilməsi, dövlət dilinin tətbiqi
işinin təkmilləşdirilməsi, Azərbaycan əlifbası və Azərbaycan
dili gününün təsdiq edilməsi haqqında 2001-ci ildə imzaladığı
fərmanlar, milli-mənəvi dəyərlərin qorunub saxlanması çağırışı
ilə Azərbaycan xalqına müraciəti, türk xalqları və dövlətləri
arasında əlifba və dil birliyinin təmin edilməsi və bir çox
digər sahələrdə coşğun fəaliyyəti Heydər Əliyevə böyük şöhrət
gətirmişdir. O, "Elmlər Akademiyasını Azərbaycan xalqının tarixi
nailiy-yəti" adlandırmış və respublikada elmin inkişafına daim
diqqət və qayğı göstərmişdir; Heydər Əliyev 15 may 2001-ci il
tarixli fərmanı ilə Elmlər Akademiyasına Azərbaycan Milli Elmlər
Akademiyası statusu verməklə, bu nəhəng elm təşkilatının
Azərbaycan xalqı qarşısındakı xidmətlərini və akademik elmin
ölkənin inkişafının əsas təminatçılarından
olduğu faktını bir daha yüksək səviyyədə təsdiqləmişdir.
Heydər Əliyevin 7 avqust 2002-ci il tarixli Sərəncamı ilə
Azərbaycan Milli Elmlər Akademiyasının Naxçivan Bölməsi
yaradılmışdir.
Azərbaycan xalqı, mütərəqqi beynəlxalq ictimaiyyət Heydər
Əliyevin anadan olmasının 75 və
80 illiyini yüksək təntənə ilə qeyd etmişdir. Respublikamızda və
bir sıra xarici ölkələrdə Heydər Əliyevin
Azərbaycanın dövlət müstəqilliyi və tərəqqisi naminə titanik
fəaliyyətindən bəhs edən silsilə kitablar, kitab-albomlar
nəşr olunmuşdur.
Heydər Əliyevin siyasi fəaliyyətinin Naxçıvan
dövrü, xüsusilə onun Naxçıvan Muxtar Respublika
Ali Məclisinin sədri vəzifəsində çalışdığı illər
(1991-93) Muxtar Respublikanın
siyasi, sosial-iqtisadi və mədəni inkişafının çətin, eyni
zamanda əlamətdar dövrüdür. Heydər Əliyev, birinci növbədə,
Naxçıvan Muxtar Respublikasını Ermənistanın silahlı təcavüzü və
işğalı təhlükəsindən xilas etdi. Bu illərdə Muxtar Respublikanın
Ali Məclisi Heydər Əliyevin təşəbbüsü ilə onun adından
"Sovet Sosialist" sözlərinin çıxarılması, Azərbaycan Xalq
Cümhuriyyətinin (1918-20) üçrəngli bayrağının Naxçıvan Muxtar
Respublikasının dövlət bayrağı qəbul olunması haqqında qərarlar
qəbul etdi. Blokada şəraitində olan Muxtar Respublikanın
iqtisadi problemlərinin həllinə ciddi diqqət yetirilirdi. Bu
məqsədlə qonşu Türkiyə və İranla iqtisadi əlaqələr yaradıldı.
Naxçıvanı Türkiyə ilə birləşdirən "Ümid körpüsü", İranla yük və
sərnişin daşınmasını genişləndirən Şahtaxtı-Poldəşt körpüsü inşa
edildi. Heydər Əliyevin Azərbaycanın siyasi rəhbərliyinə
qayıdışından sonra respublikanın digər bölgələrində olduğu kimi,
Naxçıvan Muxtar Respublikasında da əmin-amanlıq, ictimai-siyasi
sabitlik bərqərar edilmiş, iqtisadiyyatın dirçəlişi,
sosial-mədəni problemlərin həlli sahəsində diqqətəlayiq uğurlar
qazanılmışdır.
Azərbaycan
Respublikasının
Prezidenti Heydər Əliyevin "Naxçıvan Muxtar Respublikasının 75
illik yubileyi üzrə Dövlət Komissiyasının tədbirlər planı
haqqında" 12 fevral 1999-cu il tarixli sərəncamında Muxtar
Respublikanın gələcək inkişaf perspektivləri müəyyən edilmişdır.
Heydər Əliyevin
yubiley şənliklərində bilavasitə iştirakı Muxtar Respublikanın
hərtərəfli inkişaf proqramının həyata keçirilməsinə yeni güclü
impuls vermişdir.
Naxçıvan
şəhərində Heydər Əliyevin büstü ucaldılmış (1983), Heydər Əliyev
muzeyi (1999) yaradılmışdır.
Azərbaycan Respublikasının Prezidenti İlham Əliyevin Sərəncami
ilə Naxçivan şəhərində Heydər Əliyev adına Hərbi Litsey (2004)
yaradılmışdır. Naxçıvan Muxtar Respublikasının bütün
şəhər, böyük qəsəbə və kəndlərində Heydər Əliyev bağ və
parkları, meydanları salınmış, bulaq-abidə
kompleksləri, pannolar inşa edilmişdir. Kiyevdə Heydər Əliyev
adına Siyasi Elmlər və Beynəlxalq Münasibətlər İnstitutu
fəaliyyət göstərir. Heydər Əliyev məktəbləri və
universitetlərində seminarlar keçirilir.
|
